Fint Motormarked
Tekst/foto: Sivert Ole Holten, holtenmedia

Rama var den beste då NMK Vikedal arrangerte motormarked på Vikedal Motorbane på laurdag. Eit trettitals utstilte bilar i depot, saman med ulike aktivitetar rundt motorbanen, gav publikum høve til å oppleve bil og motor på mange vis. Det er andre året på rad at NMK Vikedal no arrangerer motormarked på Vikedal Motorbane, eit område som etter leiaren i klubben Steinar Høyvik si meining, høver godt for eit slikt arrangement. - Ja, på ein slik dag kan me nytte depoet vårt til utstilling av bilar, medan baneområdet kan nyttast til demonstrasjonar av ulike motorsportsaktivitetar.

Motocrossaktiviteten er aukande i klubben. Her er det kamp om plasseringa i motocrossløypa.

Slik var det på laurdag, og medan dei mest bilinteresserte kunne slå av ein bilprat i depotet, kunne andre leige seg ein bilcrossbil å ta nokre rundar rundt bilcrossbanen. I tillegg var det oppvisning av både trial, motocross, radiostyrte bilar og helikopter å få med seg. - Ja det er denne blandinga me legg opp til gjennom dette arrangementet, seier Steinar Høyvik som likevel kunne tenkt seg ei større interesse rundt eit slikt arrangement av dei som driv næring eller klubbdrift innan bil og motor. - Me veit at interessa for bil og motorsport er stor på Haugalandet og behovet for å få marknadsført dei ulike aktivitetane burde vere der. Steinar Høyvik vel likevel å sjå framover mot neste års arrangement med utgangspunkt i det som har skjedd dei to siste åra med varme og sol begge gonger.

Haugaland Classic Ford Klubb stilte med med 10-15 biler i utstillinga.

- Fint vêr betyr heilt klart mykje, og slik me har hatt det dei to siste åra er eit opplegg med muligheter. Haugaland Classic Ford Klubb gjorde ein god innsats dette året og stilte med 10-15 bilar, der til og med ein kom heilt frå Bergen i ein Ford Escort. Til neste år må målet vere å få med oss fleire merkeklubbar i tillegg til amcar og veteranbilmiljøet, seier Høyvik som kunne konstatere at den avsluttande Blårøykfestivalen i år som i fjor var ein publikumsgodbit.

Alf Magne Sørensen i BMW M3 gjekk til topps i Blårøykfestivalen.