Suksess i pøsregn, sol og snøbyger.

Rallycrossen laurdag på Vikedal Motorbane vart kjempespennande, sjølv med seks-sju grader i lufta og pøsande regn. Søndag kom snøbygene. Mange førarar rosa arrangøren NMK Vikedal for godt gjennomførte arrangement.

Bjørn Magne Moland Enge, Johny Brådli, Håkon Tveit, Trygve Hustvedt Lærdal og Marius Bergfjord vann sine klassar på Vikedal Motorbane denne helga.

For Bjørn Magne Moland Enge blei det ei ny positiv oppleving.
-I fjor starta eg rett på NM, no har eg fått kjørt to løp før NM-sesongen er i gong, og det er positivt. I tillegg fekk han kjørt bilen på vått føre.
-Sjølv om det var både vått og kaldt har i dag, er det positivt å få testa på vått, me jobba med dekk og syns me fekk det stadig betre til utover dagen.
Daniel Holten starta der han slutta i Bergen. I sitt første heat på Vikedal Motorbane i sin nye Citroen Saxo, kjørte han inn til siger og beste tid i supernasjonalklassen. Også i andre og tredje omgang vann han sine heat, før han sklei ut i grøfta i finalen.
-Masse god trening for meg, litt synd at eg ikkje fekk fullført finalen, men heldigvis ingen skader på bilen.


Geir Harald Skeie i leiing føre Bjørn Magne Moland Enge i supernasjonal

Mange var imponerte over Daniel si køyring, men ein som overraska alle var Skjalg Lothe frå KNA Haugaland, som kom til Vikedal Motorbane i ein nybygd BMW. Til slutt blei han nummer to etter Moland Enge.
-Overraska sjølv også, og sjølv om me mangla både rett innstilling på bilen og skikkelege dekk, gjekk det over all forventning.
Geir Harald Skeie blei nummer tre, medan nykommerane i supernasjonal i NMK Vikedal Per Magne Flatebø, og Kenneth Johansen blei nummer åtte og ti. For Kenneth Johansen blei det stopp etter starten i andre omgang.
-Heldigvis var det berre eit kryss på mellomakslingen som rauk, men det dummaste var at eg ikke fikk kjørt meir her i dag.

Brådli til topps
I rallycross nasjonal tok Jonny Brådli sin første siger i Vestlandsmesterskapet, etter at han vart nummer to i Bergen. Han vann A-finalen med klar margin.
-Hadde fått på plass dei rette dekka til dette løpet, og disse var mykje betre enn dei eg køyrde på i Bergen.
Nykommaren i klassen Hallvard Finnvik var den av førarane frå NMK Vikedal som gjorde det best, og sjølv om han var nervøs før start var han nøgd med både innleiingsheata og A-finalen.
-Har lagt så mykje pengar i dette at då eg kom meg til A-finalen valde eg å ta det med ro for å unngå skader på bilen.
Laurdag vart det også kjørt klubbløp i bilcross junior for NMK Vikedal sine førarar. Håkon Tveit vann løpet, føre Thomas Nonslid og Joakim Rønnevik.

Endeleg full klaff
I søndagens runde i Vestlandsmesterskapet i bilcross var NMK Vikedal-føraren Trygve Hustvedt Lærdag ute etter å rette opp den svake starten i meisterskapen. Etter innleiande stod han bokført med 27 poeng og A-finaleplass i juniorklassen.. I finalen gjekk han rett i tet og blei der.
-Endeleg fekk eg klaff, var han første kommentar då han kom ut av bilen etterpå.
-Eg har vore på pallen tidlegare, men aldri vunne, så dette var skikkeleg herleg.
Trygve Hustvedt Lærdal vann føre Tor Ivar Netlandsnes NMK Kvinesdal og Preben Myklebust NMK Egersund.


Vinnarane i bilcross junior. Trygve Hustvedt Lærdal i midten, flankert av Tor Ivar Netlandsnes (t.v.) og Preben Myklebust

Samanlagt i Vestlandsmesterskapet er Trygve Hustvedt Lærdal no oppe på andre plass.

            I bilcross var det NMK Bergen-føreren Marius Bergfjord (bilde t.h.) som gjekk til topps. I sin første sesong i bilcross senior, vann han alle sine innleiingsheat, og var den eineste som stod med 30 poeng i finalen.
-Heilt utruleg, var hans kommentar.
Kva som stod under panseret på bilen, som var heilt suveren i klassen, ville han likevel ikkje ut med.
-Nei, det er hemmeleg.

Ein annan som var nøgd var NMK Vikedal-føraren Stian Lilleskog.
-Første bilcrossløpet på fem år, og så ein andreplass. Kjempegreier.
NMK Vikedal-førarane Per-Gaute Østbø og Hans Kristjan Kristjansson hadde ein hard batalje om tredjeplassen, som Østbø kom best ut av.
NMK Vikedal er på topp også i Vestlandsmesterskapet i bilcross. Reidar Skeie leiar med 24 poeng, eit poeng føre Per-Gaute Østbø.
 


Per-Gaute Østbø ( først) og Hans Kristjan Kristjansson hadde ein tøff fight om tredjeplassen i bilcross

Nøgd løpsleiing
Søndagens bilcross gjekk i ei blanding av sol og snøbyger, men nok ein gong gjennomførte NMK Vikedal eit prikkfritt arrangement, og løpsleiarane Lajla S. Eikeland og Bryn Rønnevik var nøgde med helga.
På søndag valde til og med Bryn Rønnevik å drøye litt med finalane.
-Ja, dei hadde så mykje mat igjen i kioskane at eg gjorde det for å få litt meir sal.


Løpsleiarene i Lajla S. Eikeland og Bryn Rønnevik var nøgde med helga.