Mange på pallen, men ingen til topps.

Det var mange NMK Vikedal-førerar på seierspallen under 2-dagars bilcross/rallycross-løpet i Bergen i helga, men ingen av dei klarte å klatra heilt til topps.

I bilcross junior var det Daniel Holten og Kennet Kaldheim som gjorde det best i dei innleiande omgongane og sikra seg plass direkte i A-finalen. Etter tøff kamp og taktisk kjøring sikra Kennet Kaldheim seg andreplass der, medan Daniel Holten vart nr. 3. Gunleiv Kvål, NAF MS Gjesdal vann.


Kennet mister leiinga i alternativsporet, medan Daniel sklir ut og må sleppa Gunleiv Kvål fram til leiing.

I tillegg til Kennet og Daniel deltok og Catrine Mæland og Ingerlise S. Eikeland. Catrine hadde ein skikkeleg rundtvelt i 5. omgong som såg stygg ut. Ho var godt med ut frå start, men når dei nærma seg gjennomkjøringa får ho ein dytt i bakskjermen og fyk nærmast over vollen og landar på taket. Heldigvis vart Catrine ikkje skadd, men var naturleg nok litt rysta. Bilde av bilen etter rundvelten finn du her ... (litt nede i lista på hjullastargaflane)

I senior-klassen dominerte NMK Vikedal og fekk til slutt 4 førerar i A-finalen. Ørjan Strand Eikeland var best etter innleiande omgong, med Kenneth Johansen like bak. Men i finalen var det Karsten Hermansen frå NAF MS Gjesdal som tok starten og kontrollerte til mål. Derimot vart det hard kamp om dei andre plasseringane. Den var det Per-Gaute Østbø som gjekk seirande ut av og tok dermed andreplassen i løpet. Kenneth Johansen vart nr. 3, Glenn Olav Lothe nr. 4 og Ørjan Strand Eikeland nr. 6.


Karsten Hermansen kan heva pokalen på toppen av pallen for andre gong i karriera. Per-Gaute Østbø vart nr. 2 og Kenneth Johansen (med sonen Simen på armen) nr. 3.

Hans Kristjan Kristjansson hadde ikkje dagen og fekk og ein del "juling". Han var i D-finalen, men straum-mangel gjorde at han kjørte nærmast utan sikt. Dermed vart det 2 gonger i alternativsporet og sisteplass (21. plass). Arild Brekke deltok og, men kom ikkje til finale.

Samanlagt i Vestlandsmesterskapet for bilcross jr. har det tetna til med Aleksander Presttun, NMK Bergen fortsatt i tet med 58 poeng, Gunleiv Kvål, NAF MS Gjesdal, med 57 poeng, Kennet Kaldheim med 55 poeng og Daniel Holten med 51 poeng. I senior-klassen leiar fortsatt Per-Gaute Østbø med sine 62 poeng framfor Karsten Hermansen, NAF MS Gjesdal med 57 og Kenneth Johansen med 50.

I rallycrossklassen, som ikkje talde med i Vestlandsmesterskapet, kjørte både Joakim B. Hansen og Aleksander Skeie godt. Aleksander Skeie låg best an etter innleiande omgongar, men i finalen rauk ein drivaksling, og han måtte dermed ta til takke med 6. plass. Joakim B. Hansen vann B-finalen og i A-finalen kjørte han seg heilt opp til andreplass.
     Eirik Aasbøe og Per Magne Flatebø stilte begge til start på trening, men måtte gi seg med tekniske problemer. Eirik med blårøyk og tilløp til ulydar i motoren og Per Magne med mistanke om eksos i kjølevatnet.


Aleksander Skeie var som oftast framfor Geir Skoglund, og kom seg og forbi seinare i dette heatet.


Joakim B. Hansen får meir og meir taket på NSU'en og kjørte inn til ein god andreplass bak Arve Bernes.


Johannes Holten Leifsen lånte Volvo'en til Hallvard Finnvik til løpet i Bergen. Den fungerte godt og han er her framfor Ørjan Strand Eikeland. Til slutt vart det 11. plass på Johannes etter svartflagg i B-finalen.


Kenneth Johansen passerer Per Arne Blindheim i alternativsporet og sikrar seg ein ny heatsiger i ein innleiande omgong.


Per-Gaute Østbø passerer Sveinung Skjæveland i 5. omgong og sikrar seg 10 nye poeng og plass i A-finale.


Per Arne Blindheim har fortsatt andreplassen i A-finalen framfor Glenn Olav Lothe, Ørjan Strand Eikeland og Per-Gaute Østbø. Karsten Hermansen har allereie passert, medan Kenneth Johansen ligg litt bak Per-Gaute.