NMK Vikedal til topps i alle klassar

NMK Vikedal-førarane Martin Lillesund, Ørjan Strand Eikeland, Lars Reidar Frøyland og Anette Aarre vann alle sine klassar under todagarscrossen på Vikedal Motorbane.

Ørjan Strand Eikeland (t.h) hadde bestemt seg at denne gongen ville han satse. For 18 åringen frå Øvre Vats var dette hans tredje løp i seniorklassen i bilcross, etter at han i tre år har vore med å dominert juniorklassen. I dei innleiande omgangane hadde han så godt som full klaff og vann fire av sine fem innleiingsheat. Saman med veteranen Per Gaute Østbø hadde han til slutt 45 poeng og flest av dei over 50 deltakarane i klassen.

- Det gjekk veldig godt i dei innleiande omgangane, og i finalen hadde eg igjen bestemt meg for å gi alt, seier han, som gjekk i leiing allereie i første sving og auka på innover mot mål.

- Då eg såg at eg drog frå konkurrentane tok eg det litt med ro og sikre leiinga og sigeren innover mot mål, forklarar ein svært glad Ørjan Strand Eikeland.

- Ja, eg er eigentleg litt overraska over at det gjekk så bra.

Per Gaute Østbø, som leia både Vestlandsmesterskapet og NMK Vikedal Cup føre løpet på heimebane, kom ut sist i A-finalen, men jobba seg opp.

- Ja, med det utgangspunktet var tredjeplassen til slutt veldig bra, seier han med eit smil, sjølv om han på ny mista bilen.

- Jo, men eg var redd for at det kom til å skje og kjøpte meg ein ny, så nå blir det Golf i neste løp.

Samanlagt held Per Gaute Østbø på leiinga i Vestlandsmesterskapet og NMK Vikedal Cup, Kenneth Johansen ligg på tredje plass i begge seriane.

Vil forsvare posisjonen
I bilcross junior var det Martin Lillesund (t.h.) som drog det lengste strået, etter fire sigrar og ein andreplass i innleiande.

- Eg mista leiinga då Daniel Holten kjørte forbi meg i fjerde omgang, elles greidde eg å halde konkurrentane bak med i alle heat eg køyrde, og det er eg veldig godt nøgd med, seier Lillesund, som med dette resultatet også klatra opp på andre plass i NMK Vikedal Cup, to poeng bak Gunleiv Kvål.

Resten av året blir målet å forsvare og forbetre denne posisjonen, og også klatre oppover i Vestlandsmesterskapet, der han ligg på ein femte plass.

- Deltok ikkje i den første runden i Bergen, men reiser oppover om fjorten dagar, så får me sjå då.

I Vestlandsmesterskapet er det no Kenneth Kaldheim som er best av NMK Vikedal sine førarar og ligg på andre plass, ni poeng bak Aleksander Presttun. Daniel Holten, som vart nummer sju på søndag, ligg på fjerde plass, 11 poeng bak leiaren.

Frøyland i leiing
I rallycross vart det siger til Lars Reidar Frøyland. I minste nasjonal var det i tillegg stor NMK Vikedal dominans. Eirik Aasbøe vart nummer to, men Joakim B. Hansen enda på tredje plass, og også Egil Nybøe var i A-finalen og blei til slutt nummer seks. .

I store nasjonal var det til slutt berre Anette Aarre som kunne stille i finalen, og dermed vann ho løpet.

Lars Reidar Frøyland her tatt leiinga i NMK Vikedal Cup med 37 poeng, og leiar føre Anette Aarre på 34 og Arnt Olav Lillesund med 31 poeng.

Vestlandsmesterskapet held fram med løp i Bergen 21. – 22. juni, då med konkurranse i alle klassar.

Lars Reidar Frøyland vann ein grei seier i rallycross nasjonal i/2400 ccm