NMK Vikedal Cup

Lutsi og Fønnebø Ringhagen til topps

Ørjan Lutsi og Knut Endre Fønnebø Ringhagen avgjorde i sine klassar i NMK Vikedal Cup under finalen på Vikedal Motorbane på søndag. Lutsi med ein ny suveren seier, mens Fønnebø Ringhagen hadde marginane på si side i innspurten.

Knut Endre Fønnebø Ringhagen og Ørjan Lutsi er vinnarar av NMK Vikedal Cup 2004 i bilcross junior og rallycross nasjonal.

Ørjan Lutsi har hatt ein solid sesong i store nasjonalklassen, og med ein ny cupsiger i lomma kan han sjå tilbake på ein sesong der han har vore på toppen i samtlege rundar både i Vestlandsmesterskapet og no til sist i NMK Vikedal Cup. - Ja, det har gått bra og det gjorde det også i dag sjølv om eg kom litt dårleg ut i starten i finalen, seier Lutsi, som etterkvart la konkurrentane bak seg og tok seg inn til siger med god margin. No avsluttar han sesongen i Bergen med finalen i Vestlandsmesterskapet, før han nok kjem til å trappa ned litt til neste år. - Ja, neste år reknar eg med at det blir litt meir barnevognkjøring på meg, men eg håpar å få med meg løpa her i Vikedal, på ein bane det er topp å køyre på. Bak Ørjan Lutsi var det NMK Vikedal førarane Øyvind Tveit og Terje Steinnes som la beslag på dei neste plassane. For veteranen Terje Steinnes var dette tredje gongen han kunne klatre opp på pallen, etter at han gjorde comeback i rallycrossen i vår. - Ja, på grunn av problem med bilen, i tillegg til at eg vart sjuk, hadde eg eit opphald på to år før eg kom i gong igjen i vår, og då er det godt å sjå at eg framleis kan hengje med, seier han, som lovar at han også neste år blir å finne i startfeltet i rallycross nasjonal, men kanskje med ein annan bil enn Volvo 360´n som har blitt hans varemerke. - At eg køyrer er sikkert, men om det blir ein annan bil er ikkje avgjort enno. I samandraget i NMK Vikedal Cup nådde ingen av desse opp. Nummer to samanlagt vart Sigmund Lutsi, medan Steinar Stokke tok tredjeplassen.

Fleire i bilcross junior
I bilcross junior var det på forhånd klart at kampen om laurbærkransen i NMK Vikedal Cup ville stå mellom dei tre NMK Vikedal førerane Johan André Øverland, Knut Endre Fønnebø Ringhagen og Aleksander S. Eikeland. Øverland leia før finalen med sju poeng på Fønnebø Ringhagen, men likevel var det han som først rauk ut i kampen om topplasseringa. Etter ein andreplass i sitt heat i første omgang, blei det full stopp i andre. - Ja, det small i motoren og all motorkrafta forsvann, seier han, som kunne konstatere at både stempel og motorblokk hadde fått hard medfart. Dermed var det berre for han å vente på kva konkurrentane kunne gjere. Fønnebø Ringhagen var først ut, og etter litt problem i dei innleiande rundane måtte han vegen om B-finalen. - Me hadde rekna ut at eg måtte ha ein sjuandeplass om eg skulle ta heim cupsigeren om Eikeland skulle vinne A-finalen som han var kvalifisert til, seier Fønnebø Ringhagen om situasjonen før det heile vart sett i gong. Han kjempa lenge med Arnt Olav Lillesund om sigeren i B-finalen, men til slutt blei det den sjuande plassen han måtte ha. Etter siger både i NMK Vikedal Cup og Værstingcup, var dette over all forventning for Fønnebø Ringhagen. - Før sesongen sette eg meg som mål å kome på pallen i begge cupane, så dette blei heilt topp. Saman med Johan André Øverland var løpet på søndag det siste i bilcross junior for Aleksander S. Eikeland, som til slutt vart nummer fem i løpet og tre i cupen. No vil han satse vidare i seniorklassen med sin velbrukte Volvo 360. - Eg kjem til å starte med denne bilen i seniorklassen til våren, og er spent på korleis det vil gå, seier han, som kan konstatere at siste delen av sesongen har gått svært bra. - Her i Vikedal har eg fått startsvingen til å fungere betre enn tidlegare, og det er nok grunnen til at eg har kome meg til A-finalen i alle dei fire løpa som har gått her sidan juni. NAF Gjesdal føreren Karl Helland vann juniorklassen på søndag, før Arnt Olav Lillesund KNA Haugaland og Stian Lilleskog NMK Vikedal.

I den svært fyldige bilcrossklassen vart det til slutt dobbelsiger til NAF Gjesdal med Gisle Morten Hetland og Kjell Rødberg, med NMK Bergen føraren Jørn Ahmer på tredje plass. På dei neste plassane kom Kristoffer K. Bjelland, Hans Kristjan Kristjanson og Rudi Soltvedt.

Gisle Morten Hetland køyrte inn til siger i bilcross.

Det vart også køyrd gjesteklasse i rallycross supernasjonal med Johannes Holten Leifsen i Ford Focus og Ernst Holten Leifsen i Volvo 240 EVO på startstreken. Dei vann kvar sin omgang før Johannes Holten Leifsen fekk stopp i tredje omgang. Det vart ikkje køyrd finale.

Sluttstillinga i NMK Vikedal cup etter finalen finn du her ...