Øverland og Frøyland best i Vikedal
| Med svært mange førarar frå NMK Vikedal gjorde også førarane frå arrangørklubben reint bord i begge klassane under bilcrossen på Vikedal Motorbane på søndag. Johan André Øverland (t.v.) vann juniorklassen, medan Lars Reidar Frøyland (t.h.) gjekk til topps hos seniorane. |  |
For Lars Reidar Frøyland frå Tysvær var dette den første
sigeren i bilcross etter at han starta med bilsport for fem-seks
år sidan. Han gjorde kort prosess med konkurrantane i dei
innleiande omgangane, og var saman med Steinar Høyvik den
einaste som greidde å ta full poengpott i før finalane. I
A-finalen gjekk Frøyland direkte i tet med kompisane Steinar
Høyvik og Martin Tveit på dei neste plassane. Alle frå
Tysvær kommune og Team Higre. - Ja, det var Steinar Høyvik og
eg som starta Team Higre for fem-seks år sidan, og namnet har
me tatt fordi Tysvær kommune har ein higre i kommunevåpenet
sitt, og me følte at det passa, sier Frøyland som kunne
konstatere at i dag blei det full uttelling for teamet. - I
tillegg til oss tre her i bilcrossklassen var både Stian
Lilleskog og Jens Idar Juel begge i A-finalen for juniorane, og
blei til slutt nummer to og fire, så dette var kjempegreier.
Fram til i fjor var det Ford Escort for både Frøyland og
Høyvik, men no er det folkevogn for begge to. Steinar Høyvik
syns det var spesielt artig å kome på pallen med akkurat denne
bilen. -Dette er ein bil som eg har bygd opp og skrudd saman
sjølv, så dette var moro.
Lars Reidar Frøyland, Steinar Høyvik og Martin Tveit vart
nummer ein, to og tre i bilcrossklassen.
Øverland til slutt
Medan det heile vart avgjort utan særleg dramatikk i
seniorklassen, blei det mykje meir dramatisk i juniorklassen der
Aleksander S. Eikeland gjekk i tet frå start i A-finalen, som
han hadde gjort det i alle dei innleiande omgangane. Men etter
eit par rundar hamna han utanfor banen, og Stian Lilleskog
overtok leiinga. Det skulle likevel ikkje bli han som til slutt
kunne dra sigeren i land. Johan André Øverland kom sist ut
frå start, men hadde begynt opphentinga, og til slutt var det
berre Stian Lilleskog igjen. - Ja, Stian sklei ut i nest siste
sving og eg kunne til lett ta meg forbi og inn til siger, seier
Øverland som med dette resultatet også har gått opp i leiinga
samanlagt i NMK Vikedal Cup. Stian Lilleskog vart til slutt
nummer to og Joakim B. Hansen nummer tre.
Johan André Øverland tar seg forbi Stian Lilleskog i nest
siste sving og vinn løpet.