Flott vær og spennande klubbløp
Det vart ei fin helg på mange måtar rundt klubbløpet.
Laurdag var det godt frammøte på dugnaden i strålande
seinsommarvær. Mykje godt arbeid vart gjort med maling, rydding
og kantslått. På søndagen var det mest like fint vær, slik
at medlemsmøte vart halde på grasplenen framfor kioskane. Meir
om det i eiga sak.
Klubbløpet kom
litt brått på enkelte, så det var ikkje alle som hadde kjørbare
bilar. Det vart likevel tilsaman 28 deltakerar, noko som er svært
bra. Etter innspel frå dei aktive opna løpet med ein bakkeløpsomgang,
før det vart kjørt 2 vanlege bilcross-omgangar.
Rallycrossbilane kjørte trening i den same traseen i 1. omg.,
men kjørte "bakkeløp" ein og ein i 1,5 runde i
rallycrosstraseen i dei 2 andre omgangane. For Bjørn G. Lunde
vart og dagen litt annleis enn tenkt. Gode eller dårlege
kameratar hadde fått han med som tjuvstartdommar. Dette gjekk
han med på men gav beskjed om at han måtte tidleg heim for det
var ein spesiell dag. På førarmøte vart det opplyst at han
som 40-års presang skulle få eit løp med ein bilcrossbil. Alt
var klart, det var berre å få på seg kjøredress og hjelm.
I bilcross
junior dominerte Ernst Harald heile dagen. Ragnvald sleit med
ein lånt bil som ikkje ville gå, og "dei blå lyn"
frå Røyksund (Roald Johan og Rolf Andre) klarte heller ikkje
å halda følgje. På startstreken i finalen hadde Ernst Harald
Sierraen til Rolf Andre på sida av seg. Vidare stod Rikard,
Stian, Roald Johan og Ørjan. Ut frå start vart det laga plog,
og fleire bilar vart ståande. Løpsledelsen bestemte då å
flagga av løpet og ta ein omstart. Dessverre vart Rolf Andre
sin bil ikkje klar til omstarten. 2. forsøket gjekk noko betre,
men også denne gongen vart det litt plog, noko som gjekk ut
over hjula til Stian. Det eine punkterte, og det andre stod
ikkje heilt beint. Han måtte dermed gi frå seg 2. plassen og
kjørte i depotet. Ernst Harald kom ut først, med Roald Johan
litt bak. Rett bak han kom Ørjan og Rikard til slutt. Dommaren
syntest Roald Johan hadde vore litt for brutal i starten og gav
han eit advarselflagg. Dessverre misforstod han dette og stoppa.
Dermed var Ørjan oppe på 2. plass og Rikard på 3. Sjølv om
bilen til Ørjan byrja å fuska litt klarte han å halda Rikard
bak seg.
Øyvind
dominerte nesten like mykje blandt seniorane som Ernst Harald
blandt juniorane. Det var berre Johannes som øydela med å vera
raskast i bakkeløpet, heile 1,6 sek, framfor Øyvind. I
B-finalen skjedde det ikkje så mykje. Tom Jøran kunne ikkje
stilla til start, ettersom han kolliderte inn i sida på bilen
til broren i ein innleiande omgang. Etter det egna framhjula seg
best som snøplog. Teten var det Bjørn Lunde som tok etter 6.
beste tid i bakkeløpet og ein heatseier. I andre omgang stoppa
bilen. Og Bjørn viste at han kan gamle kunster. Han vant
B-finalen framfor Kjetil, Martin, debutanten Einar og Odd Arild
(på 3 hjul). I A-finalen var det Øyvind og Johannes som stod
best til i finalen. Utanfor dei stod Arild, Lars Reidar, Steinar
og Bjørn. Etter ein halv runde leia som venta Øyvind framfor
Johannes, Arild, Steinar, Bjørn og Lars Reidar. Øyvind
kontrollerte løpet, og sat berre og gliste i bobla. Bak han
vart det litt skiftingar slik at Steinar kom opp på 2. plass,
Johannes vart nr. 3, Bjørn nr. 4, Lars Reidar nr. 5 og Arild
nr. 6.
I
rallycross var naturleg nok Knut Olav i ein klasse for seg med
sin Volvo i supernasjonal o/2000 ccm. Dei andre kjører jo
rallycross nasjonal. Den som fekk det best til av desse var
Kjell Martin, framfor Terje som fekk nestbeste tida i
rallycrosstraseen i siste omgang. Terje kjører med lånt
girkasse, og slit litt med den. Den passar visst ikkje heilt til
bil og motor, noko som går ut over flyten i kjøringa. Ben Inge
fekk det heller ikkje til så godt som han viste i Bergen. Øyvind
er tilbake etter beinbrudd, men om det var det som gjorde at det
vart ei snurring i siste omgang skal vera usagt.
Dei som
er interessert i korleis bilcross-bilane hevda seg i bakkeløpet
mot rallycross-bilane kan sjå nederst på sida. Der er ei
oversikt over tidene for alle uansett klasse i første bakkeløpsrunden.
Alt i alt var det ein svært triveleg dag med positive tilbakemeldingar. Det var ein del kommentarar om at den nye grusen var glatt, men vi reknar med at årsaka er ein del småstein som har blitt liggande på toppen etter at sanden er vaska litt ned. Dette vil nok bli betre med meir kjøring.